小辰光，凡是用電燈個人家，儕要辣燈頭跟燈泡連線個地方貼一張封條。搿種事體辣今朝看來有點勿可思議，但確確實實發生過。（文/錢紅春 配音/丁婷婷）
阿拉小個辰光，住辣一條邪氣嘈雜個弄堂裡，弄堂裡向儕是高高低低個木板房，住辣裡向個大多數是做小生意或者附近工廠個工人。迭辰光雖然已經有了電燈，但用得上個嘸沒幾家人家。勿單單是因為電燈比起蠟燭、煤油燈開銷大，還因為用電燈有交關多個麻煩。
迭個辰光上海剛剛解放，大家個生活水平勿高，擺得上臺面個家用電器就是電燈，收音機更加勿談，就只有弄堂裡向開菸紙店個老闆屋裡有。講起電燈，大多數人家就一隻燈頭，為了省電，一般儕是辣屋裡個隔牆頂高頭鑿只洞，燈泡就吊辣洞裡向，裡向外頭儕有點光。有樓浪個人家，就辣地板浪挖只洞，讓樓下頭個電燈光透一眼到樓浪向。因為家家人家用電省，每個月用電量勿多，整條弄堂幾十家人家就合用一隻電錶。但是房子有大有小，人口有多有少，燈頭有個人家多，有個人家少，燈泡也是有大有小，每家人家個電費是按照燈頭多少，燈泡大小來算個，葛咾每個月收電費是一樁邪氣吃力複雜個事體。當時個燈泡質量勿大好，常常要壞，一壞就要調。後來發覺每個月收上來個電費跟電力公司要收個差距越來越大，平攤到每家人家費用當然也越來越多，乃末意見就多了。居委會就組織有關人員一家家排查，尋找原因，原來是有些人家燈泡壞脫以後，勿打聲招呼就自說自話拿原來個小燈泡換成大燈泡，還有更加骯三個是，個別人家白天勿開燈是小燈泡，到仔夜裡開燈個辰光調成大燈泡，但是電費還是按照原來登記個小燈泡算，少收電費個漏洞總算尋著哉。為了避免再出現迭種弄虛作假個情況，規定凡用電燈個人家，儕要辣燈頭跟燈泡連線個地方貼一張由居委會蓋章個封條，燈泡勿允許隨便調，假使壞脫，一定要辣居委會有關人員個監督下調，調好以後重新貼上封條。
電燈雖然亮，而且清爽安全，但按照當時家庭個經濟情況，多數人家只有一隻燈頭，燈泡一般也就是十五支光，個別人家最大也只有二十五支光。由於規定電燈只能固定辣一個地方，勿好隨意移動，加上調只燈泡又介麻煩，所以有些人家還是覺著點蠟燭或煤油燈省事體。我記得住辣阿拉對門個山東大娘，有天老家來了親戚，天黑個辰光，伊神氣活現個開亮電燈，讓鄉下個親戚羨慕得勿得了。啥人曉得夜飯吃到一半，燈泡突然壞脫，屋裡向墨漆烏黑，伊一雙小腳來來回回尋居委幹部，尋遍弄堂勿見人影子，原來迭位裡委幹部有事體出門還嘸沒回來，其他人又勿肯擔肩胛，無奈之下，伊只好重新點起煤油燈救急。
不過，迭段辰光勿長，後來大家個經濟條件好了，勿僅家家用上了電燈，而且收音機也逐步普及，用電量與日俱增，合用電錶個範圍也小仔交關，大家勿再為電費分攤斤斤計較，貼辣電燈跟燈頭浪向個封條也終於扯脫了。搿種事體辣今朝看來有點勿可思議，但確確實實發生過。
